۲۳ تير ۱۳۸۹
گونده منه باش ووران ايندي منه داش وورور.
ايندي منه داش ووران اوزگلره باش وورور.
اوزگه اگر داش وورا دردينه دوزمك اولار.
باخ بورا سوز بوردادي داشلاري يولداش وورور...
+ آردینی اوخو
۲۳ تير ۱۳۸۹
ستارخان
حال مجذوبيم گؤروب ، قارء ، دئمه ديوانه دير ،
نعرۀ شوريده مي ظن ائتمه بير افسانه دير ،
شاعرم ، طبعيم دنيز ، شعر تريم دردانه دير ،
بهجتيم ، عيشيم ، سروريم ، وجديم احرارانه دير ،
انجذابيم جرئت مردانه مردانه دير ،
آفرينيم همت والاي ستارخانه دير !
تاكي ، ملت مجمعين تهراندا ويران ائتديلر ،
توركلر ستارخان ايله عهد و پيمان ائتديلر ،
ظلم و استبداده قارشي نفرت اعلان ائتديلر ،
ملته ، مليته جان نقدي قربان ائتديلر ،
آيه « ذبح عظيم » اطلاقي اول قربانه دير ،
آفرينيم همت والاي ستارخانه دير !
حق مدكار اولدي آذربايجان اتراكينه ،
آل قاجارين پروتست ائتديلر ضحاكينه ،
اول شهيدانين سلام اولسون روان پاكينه ،
كيم ، توكؤلموش قانلاري تبريز و تهران خاكينه ،
اونلارين جنت دگولدور منزلي ، آيا نه دير ؟
آفرينيم همت والاي ستارخانه دير !
ايشته ستارخان ، باخيز ، بير نوعي اقدامات ائديب ،
بير وزير و شاهي يوخ ، دونياني يكسر مات ائديب ،
عرض اسلامي ، وطن ناموسيني يوز قات ائديب ،
حرمت حيثيت ملتين اثبات ائديب ،
ايندي دونيانين ، توجه نقطه سي ايرانه دير ،
آفرينيم همت والاي ستارخانه دير !
ايشته ستارخان ، باخيز ، ايراني ايفا ائيلدي ،
تورك لوك ، ايرانلي ليق تكليفين ايفا ائيلدي ،
بير رشادت ، بير هنر گؤستردي دعوا ائيلدي ،
دولتين بير « عين » ني دونياده رسوا ائيلدي ،
قاچماييب پروانه تك اوددان ، دئمه پروانه دير ،
آفرينيم همت والاي ستارخانه دير !
آفرين ؛ تبريزيان ، ائتديز عجب عهده وفا
دوست و دوشمن ال چاليب ائيلر سيزه صد مرحبا !
چوخ ياشا ، دولتلي ستارخان افنديم ، چوخ ياشا !
جنت اعلاده پيغمبر سيزه ائيلر دعا ،
چون بو خدمتلر بوتون اسلامه دير ، انسانه دير ،
آفرينيم همت والاي ستارخانه دير !
+ آردینی اوخو